ديوان الشاعر احمد الذهبي...رساله من الغربه

أهلي .. شلونكم ؟ زينين ؟ مرتاحين ؟
وشلون المدارس والصبح والناس ؟؟
وشلون الوطن واطفالنه الحلوين ؟؟
وشلون أصدقائي ؟ بيكم يمرون ؟؟
متأكد علّي سألو وكالو وين ؟؟
وشلون الشمس صاحبتي وانه بعيد؟
تعبها أنتظاري وعذبتها سنين
من يوم البعد وعيوني عالشباج
كل نسمة هوى أسألها أنتي منين ؟
بلكي بوحده منهن والكه ريحتكم
وأشتمها وأموت بريحة الطيبين
ثوب الغربه ذله ولابسه وخجلان
وكل لحظه بركبتي تمر الف سجين
أهلي .. هنا الخبزه بلا طعم والله
ناكلها بمراره ونبقه جوعانين
وانتم جوعكم خوّف كلوب الجوع
وبكسرة عوافي الخبزه شبعانين
بالغربه البرد جوه الظلع شفناه
نتغطه بّرد ونّام بردانين
وانتم بالبرد بالليل تتغطون
وبحظن امي كلكم للصبح دافين
أهلي بعيني يزغر كلشي بالأيام
بس تكبر لهفتي لديرة النهرين
ويريد الدمع ينزل وما خليه
خاف أسم ألعراق يطيح من العين
وخاف ادموعي تخلص من اجي لبغداد
وبيوم الطبك بيش ابجي عالّحسين