قصيده الاخوه .....العملاق احمد الذهبي

نهر خوه صرت من رادو الماي
اخوتي وعافية عمري يشربون
يجون اعله الجرف واصعد للحلوك
حته بهاي ماأقبل يدنكون
وجسر لجدامهم مديت الظلوع
علّي بيه ردتهم من يعبرون
ويوم المات جرفي وغمض العين
ولا صرخة اخو بين اليشيعون
عليه جفوفهم ماشكة الثوب
وعليهم جان دمعي يشك العيون
ادين انطيتهم لمشاكف الموت
وبديه الطيحتي كامو يصفكون
سيفي انطيته من احتاجو السيف
وشفت ضهري ولكيته بسيفي مطعون
نسو شارة الخوه تعثر اليبيع
لان حلفو جذب باجر يعثرون
شجرتهم جنت من لسعة الصيف
وحدر فيي شكثر جانو يكعدون
وكتهم من برد صارو علي فوس
واجو مني المواكدهم يحطبون
مطر ما اريدهم ومبارك غيوم
واكل للزامطو باجر يمطرون
شو ما غيمو بس مطرو جروح
عله خدود الكلب بس كلبي شاطر
يفك باب المحنه بوجه العتاب
واصد ارماح اخوتي بصدر شاعر
عمر لخيولهم صرت انه ميدان
علي تسحك واصفكلها الحوافر
واصيرلهم شفايف من يطعنون
وابوس اثار طعنات الخناجر
وادفنها المشاعر بلكن تموت
وترد اردود واتخظر مشاعر
خذت طبع الجبل كل طعنه بي غار
ولا شافه السفح مكسور خاطر
مثل موت الشمس هيج انه بالموت
يضمني الليل ويطلعني باجر
مادام بصدرها برودة الماي
خلي الدوس بضهور الكناطر